ഓരോ വിദ്യാലയത്തെയും ഓരോ ക്ലാസ്സിനേയും ഓരോ കുട്ടിയേയും മികവിലേക്ക് നയിക്കാന്‍.... പുതിയൊരു അധ്യയനവര്‍ഷത്തിലേക്ക് ഏവര്‍ക്കും സ്വാഗതം ..

16 June, 2018

ജൂൺ 15 വെള്ളി -പുതിയ അധ്യയന വർഷത്തിലെ രണ്ടാം ശനിയും ഞായറുമല്ലാത്ത ആദ്യത്തെ പൊതു അവധി, പെരുന്നാൾ ദിനം. തൊട്ടു വരുന്ന  ശനിയും ഞായറും കൂടിയാകുമ്പോൾ മൂന്നു ദിവസത്തെ അവധി ആസ്വദിക്കാനുള്ള തയ്യാറെടുപ്പ് മുമ്പേ നടത്തിക്കാണും പലരും.. പക്ഷെ, ഓർക്കാപ്പുറത്തായിരുന്നു വ്യാഴാഴ്ച വൈകുന്നേരം മൂന്നരയ്‌ക്ക് സുസ്മേരവദനനായി ഹെഡ്മാഷുടെ എളിമയോടെയുള്ള അഭ്യർഥന,
''നമ്മുടെ വിജയൻ മാഷിന് നാളെ മാത്രമേ സമയമുള്ളൂ.. ഹെഡ് മാഷായി പ്രമോഷൻ കിട്ടി ഇപ്പം പോയതല്ലേയുള്ളൂ.. സാധ്യായ ദിവസങ്ങളിലും, ശനിയാഴ്ചയുമൊന്നും സ്കൂൾ ഒഴിവാക്കി വരാൻ മാഷിന് കഴിയില്ലത്രേ... നാളെയാണെങ്കിൽ പെരുന്നാൾ അവധിയല്ലേ.. രാവിലെ മുതൽ വൈകുന്നേരം വരെ മാഷ്  ഫ്രീയാണ്... നമ്മൾ റെഡിയാണെങ്കിൽ  ഗണിത പഠനോപകരണ നിർമ്മാണ ശില്പശാല നാളെത്തന്നെയാവാമെന്ന് മാഷ് പറയുന്നു.. പെരുന്നാളാണ്.. ലീവാണ്...വീട്ടിൽ പല തിരക്കും കാണും.. എങ്കിലും കുറച്ചു പേരെങ്കിലും നാളെ വരികയാണെങ്കിൽ വിജയൻ മാഷുടെ സേവനം പ്രയോജനപ്പെടുത്തി നമുക്ക് എൽ.പിയിലും യു.പി.യിലും ഓരോ ക്ലാസ്സിലേക്കെങ്കിലും ഗണിത ലാബിനാവശ്യമായ ഉപകരണങ്ങൾ ഉണ്ടാക്കാമായിരുന്നു.. എന്താ നിങ്ങടെ അഭിപ്രായം? ബുദ്ധിമുട്ടാണെങ്കിൽ വേണ്ട."
 ഗണിത ലാബ് ഇല്ലാതെ ഒന്നു  ശരിയാകില്ലെന്നും എത്രയും പെട്ടെന്ന് അത് ഒരുക്കിത്തരണമെന്നും ഇന്നലെയുംകൂടി എച്ച്.എം നോട് പറഞ്ഞ കണക്ക് ടീച്ചർക്ക് എങ്ങനെ 'നോ' പറയാൻ പറ്റും?
കൂളിയാട് സ്കൂളിലെ വിജയൻ മാഷെ കിട്ടിയാൽ സംഗതി എളുപ്പം നടക്കുമെന്ന് എസ്.ആർ.ജി.യോഗത്തിൽ നിർദേശം വെച്ച ടീച്ചർക്ക് ഇനി പരിപാടിക്ക് വരാതിരിക്കാൻ പറ്റുമോ?
 " യു.പി.ക്ലാസ്സിലേക്കാവശ്യമായ സാധനങ്ങൾ വാങ്ങാൻതന്നെ പത്ത് പന്ത്രണ്ടായിരം രൂപ വേണ്ടി വരും.. എൽ.പി.ക്ക് ഒരു അയ്യായിരം വേറെയും.ഫണ്ടില്ലാതെ...?"
         അവധിക്കാല പരിശീലനത്തിൽ നിന്നും ലഭിച്ച അറിവ് വെച്ച് ഒരധ്യാപക തന്റെ ആശങ്ക അറിയിച്ചു.
   "ഓ.. അതൊന്നും ഒരു പ്രശ്നമല്ല.. നിങ്ങൾ ലിസ്റ്റ് തന്നോളൂ.. സാധനം ഞാൻ വാങ്ങിക്കോളാം.. ആദ്യം  കാര്യം നടക്കട്ടെ." ഹെഡ് മാഷ് ഇതുകൂ ടിപ്പറഞ്ഞപ്പോൾ, '
     'പിന്നെത്തർക്കം പറഞ്ഞില്ല.......'
എല്ലാരും റെഡി! കുറച്ച് രക്ഷിതാക്കളെയും വിളിക്കാൻ ധാരണയായി.
           പെരുന്നാൾ ദിവസം എവിടെയും പോകാതെ സ്വസ്ഥമായി വീട്ടിലിരിക്കാമെന്ന് കണക്കുകൂട്ടിയിരിക്കുമ്പോഴാണ് രാത്രി
പത്തു മണിക്ക് ഫോൺ വരുന്നത്,
"മാഷേ, നാളെ രാവിലെ എന്താപരിപാടി?''
  ''ഒന്നൂല്യ.... എന്താ കാര്യം?" ഞാൻ ചോദിച്ചു.
 "സ്കൂളിൽ കുറച്ച് ടീച്ചർമാരും രക്ഷിതാക്കളും രാവിലെ  വരാമെന്ന് ഏറ്റിട്ടുണ്ട്. നമുക്ക് ആ ഗണിത ശില്പശാലയങ്ങ് നടത്ത്യാലോ? കൂളിയാട്ടെ വിജയൻമാഷ് സഹായിക്കാമെന്ന് പറഞ്ഞു .. നിങ്ങക്ക് രാവലെ ഒന്ന് വന്നിറ്റ് പോയിക്കൂടേ?"
            കുട്ടികളുടെ പഠന മണിക്കൂറുകൾ നഷ്ടപ്പെടുത്താതെ അവധി ദിവസങ്ങളിൽ ഇത്തരം ശില്പശാലകൾ നടത്തണമെന്ന് പ്രഥമാധ്യാപക യോഗത്തിൽ കഴിഞ്ഞ
ദിവസം കൂടിപറഞ്ഞ ഞാൻ ഒഴിവു കഴിവു പറയുന്നതെങ്ങനെ?
      അങ്ങനെയാണ് ഇന്ന് രാവിലെ 9.30നു തന്നെ കൊടക്കാട് ഗവ.വെൽഫെയർ യു.പി.സ്കൂളിൽ എത്തിയത്‌. പ്രഥമാധ്യാപകൻ പ്രിയ സുഹൃത്ത് കെ.ടി.വി.നാരായണനും, സഹപ്രവർത്തകരും, കുറച്ച് രക്ഷിതാക്കളും നേരത്തേയെത്തി ഒരുക്കങ്ങൾ തുടങ്ങിയിരുന്നു. അല്പ സമയത്തിനുള്ളിൽ ഉപജില്ലാ വിദ്യാഭ്യാസ ഓഫീസർ എം.കെ.വിജയകുമാറും റിസോഴ്‌സ് പേഴ്സണായ എം.വി.വിജയൻ മാഷും എത്തി.  പിന്നെ ഒട്ടും വൈകിയില്ല. ഹ്രസ്വമായ  ഉദ്ഘാടനച്ചടങ്ങിനു ശേഷം വിജയൻ മാഷുടെ നേതൃത്വത്തിൽ ഗണിത പനോപകരണ നിർമ്മാണം ആരംഭിച്ചു.. (അതിനു മുമ്പുതന്നെ ഉച്ചഭക്ഷണത്തിനുള്ള ഒരുക്കങ്ങൾ അടുക്കളയിൽ തുടങ്ങിയിരുന്നു .. പെരുന്നാൾ സ്പെഷ്യൽ 'നോൺ' സഹിതം.)
       ശില്പശാല വൈകുന്നേരം വരെ തുടരും.. കഴിയാവുന്നത്ര ഉപകരണങ്ങൾ ഉണ്ടാക്കും. തിങ്കളാഴ്ച മുതൽ ക്ലാസ്സിൽ പ്രയോജനപ്പെടുത്തും..
'ഗണിതം മധുരം' യാഥാർഥ്യമാകും.

              പ്രഥമാധ്യാപകന്റെ
              നേതൃത്വം,
              ഇടപെടൽരീതി,
              അക്കാദമിക മോണിട്ടറിങ്ങ് -
              ഏതൊരു
              പൊതു വിദ്യാലയത്തെയും
              മികവിലേക്കു നയിക്കുന്ന
              പ്രധാന ഘടകങ്ങൾ
              ഇതൊക്കെത്തന്നെ.
[കെ.നാരായണൻ, ബി.പി.ഒ, ബി.ആർ.സി.ചെറുവത്തൂർ ]



07 June, 2018

കൂലേരി സ്കൂളിൽ കുഞ്ഞുങ്ങൾക്കൊപ്പം രക്ഷിതാക്കളും ക്ലാസ്സിൽ



 ഒന്നാം ക്ലാസ്സിലെ പഠന പ്രവർത്തനങ്ങൾ നേരിൽ കണ്ടറിയുന്നതിനായി കുഞ്ഞുങ്ങൾക്കൊപ്പം രക്ഷിതാക്കളും ക്ലാസ്സിൽ. തൃക്കരിപ്പൂർ കൂലേരി ഗവ: എൽ.പി.സ്കൂളിൽ ചെറുവത്തൂർ ബി.ആർ.സിയുടെ സഹകരണത്തോടെ സംഘടിപ്പിച്ച വേറിട്ട രീതിയിലുള്ള ക്ലാസ്സ് പി.ടി.എ യോഗത്തിലേക്കാണ് രക്ഷിതാക്കൾ ഏറെ താല്പര്യത്തോടെ എത്തിയത്.ബി.ആർ.സി ട്രെയിനർ പി.വി.ഉണ്ണി രാജൻ ഓരോ കുട്ടിയോടും അവരവരുടെ  കുപ്പായത്തിന്റെ വിശേഷങ്ങൾ ചോദിച്ചു കൊണ്ട് ക്ലാസ്സ് ആരംഭിച്ചപ്പോൾ അവർ വാചാലരായി. സ്മാർട്ട് ക്ലാസ്സ് മുറിയിലെ സ്ക്രീനിൽ തെളിഞ്ഞ കാക്കയുടെ കുപ്പായത്തെക്കുറിച്ചുള്ള  ചോദ്യത്തിനുത്തരമായി കുട്ടികൾ പറഞ്ഞ കാര്യങ്ങൾ ചേർത്ത്''കാക്കയ്ക്കുണ്ടൊരു കുപ്പായം..കറുത്ത കുപ്പായം '' എന്ന രണ്ടു വരി പാട്ട് മാഷ് പാടിയപ്പോൾ കുട്ടികൾ അത്യുത്സാഹത്തോടെ ഏറ്റു പാടി.തുടർന്ന് കാണിച്ച തത്തയെ കുറിച്ചും ,കൊക്കിനെക്കുറിച്ചും കുട്ടികൾ സ്വന്തമായി വരികൾ കൂട്ടിച്ചേർത്ത് പാടി 'തത്തയ്ക്കുണ്ടൊരു കുപ്പായം..പച്ചക്കുപ്പായം കൊക്കിനുണ്ടൊരു കുപ്പായം...വെള്ളക്കുപ്പായം."ഒടുവിൽ പുള്ളിക്കുപ്പായമിട്ട കൊച്ചു പെൺകുട്ടിയെക്കുറിച്ചും അവർ വരികളുണ്ടാക്കി."ദേവുവിനുണ്ടൊരു കുപ്പായം.... പുള്ളിക്കുപ്പായം "കുട്ടികൾ പറയുന്നതിനുസരിച്ച് ഒന്നാം തരത്തിലെ വിനീത ടീച്ചർ ഈ വരികൾ ചാർട്ടിലെഴുതി.. തുടർന്ന് സ്വയം ഈണം കണ്ടെത്തി എല്ലാരും ചേർന്ന് താളമിട്ട് പാടുന്നതു കണ്ടപ്പോൾ കുട്ടികളുടെ കഴിവിലും പുതിയ പഠന രീതിയിലും രക്ഷിതാക്കൾക്ക് മതിപ്പ്. ആശയാവതരണ രീതിയിൽ വാക്യങ്ങളിൽ നിന്ന് വാക്കുകളിലേക്കും വാക്കുകളിൽ നിന്ന് അക്ഷരങ്ങളിലേക്കും കുട്ടികളെ നയിക്കുന്ന പുതിയ ഭാഷാ പഠന രീതിക്കുറിച്ച് ബ്ലോക്ക് പ്രോഗ്രാം ഓഫീസർ കെ.നാരായണൻ വിശദീകരിച്ചപ്പോൾ അവർക്ക് പൂർണ്ണ സംതൃപ്തി. പിന്നീട് നൽകിയ ചിത്രങ്ങൾക്ക് നിറം നൽകുന്ന പ്രവർത്തനത്തിലും കുട്ടിക ൾ മികവ് പുലർത്തി. ചെറുവത്തൂർ ഉപജില്ലാ വിദ്യഭ്യാസ ഓഫീസർ എം.കെ.വിജയകുമാർ ക്ലാസ്സ് പി.ടി.എ ഉദ്ഘാടനം ചെയ്തു. പ്രഥമാധ്യാപകൻ എം.പി.രാഘവൻ അധ്യക്ഷത വഹിച്ചു.ബി.ആർ.സി ട്രെയിനർമാരായ പി.വേണുഗോപാലൻ, പി.കെ. സരോജിനി, പി.ടി.എ പ്രസിഡണ്ട് വി.എം.ബാബുരാജ് എന്നിവരും പരിപാടിയിൽ സംബന്ധിച്ചു. ഒന്നാം ക്ലാസ്സിൽ പ്രവേശനം നേടിയ 33 കുട്ടികളിൽ 28 പേരുടെ രക്ഷിതാക്കളും രാവിലെ പത്തു മണി മുതൽ ഉച്ചയ്ക്ക് ഒരു മണി വരെ നടന്ന മാതൃകാ ക്ലാസ്സിലും, ക്ലാസ്സ് പി.ടി.എ യോഗത്തിലും പൂർണ്ണ സമയപങ്കാളികളായി.


31 May, 2018


Poster 1 Final Updated Time by Razeena Shahid on Scribd

✒✒അവധിക്കാല അധ്യാപക പരിശീലനം മെയ് 17ന്  സമാപിച്ചു.ചെറുവത്തൂർ ഉപജില്ലയിൽ പ്രൈമറി വിഭാഗത്തിൽ (std.1 to 7 ) ആകെ പങ്കെടുക്കേണ്ടിയിരുന്ന 547 അധ്യാപകരിൽ 525 പേരും പരിശീലനത്തിൽ പങ്കെടുത്തു.ശാരീരിക അവശതകൾ ഉൾപ്പെടെ വ്യക്തമായ കാരണങ്ങൾ അറിയിച്ചവരാണ് പങ്കെടുക്കാത്ത 22 പേരും... 8 ദിവസത്തെ പരിശീലനത്തിന്റെ അവസാന നാളിൽ അധ്യാപകരിൽ നിന്നും നല്ല ഫീഡ്ബാക്കാണ് ലഭിച്ചത്... പുതിയ അധ്യയന വർഷത്തിൽ ഓരോ കുട്ടിയെയും ഓരോ വിദ്യാലയത്തെയും മികവിലേക്ക് നയിക്കാനാവശ്യമായ ഒട്ടേറെ വിഭവങ്ങൾ പരിശീലനത്തിലൂടെ ലഭിച്ചുവെന്നു തന്നെയാണ് ബഹുഭൂരിപക്ഷം അധ്യാപകരുടെയും അഭിപ്രായം.എൽ.പി. ക്ലാസ്സുകളിലെ ശാസ്ത്ര പരീക്ഷണങ്ങളും, 
ഗണിത പഠനോപകരണ നിർമാണവും അധ്യാപകരെ ആവേശഭരിതരാക്കിയിട്ടുണ്ട്. ക്ലാസ്സ് റൂം പ്രവർത്തനങ്ങളിൽ ഇവ നന്നായി പ്രയോജനപ്പെടുത്താൻ കഴിയുമെന്ന ആത്മവിശ്വാസത്തോടെയാണ് ഓരോരുത്തരും വിദ്യാലയത്തിലേക്ക് പോകുന്നത്.
          അധ്യാപക പരിശീലനം മെച്ചപ്പെട്ടതായിരുന്നുവെന്ന് ഓരോ അധ്യാപകനും പറയുമ്പോൾ ,അതിന്റ ക്രെഡിറ്റ് പരിശീലനത്തിന് നേതൃത്വം നൽകിയ RP മാർക്കു തന്നെയാണ്. ഏപ്രിൽ 16ന് ആരംഭിച്ച DRG പരിശീലനം തൊട്ട്  മെയ് 17 വരെയുള്ള ഒരു മാസക്കാലം മറ്റു തിരക്കുകളെല്ലാം മാറ്റിവെച്ച്  അധ്യാപക പരിശീലനത്തിനു നേതൃത്വം നൽകിയ R P മാരായ 40 അധ്യാപക സുഹൃത്തുക്കളെ എത്ര അഭിനന്ദിച്ചാലും മതിയാകില്ല .. 
(പല വിധ കാരണത്താൽ മുൻ RP മാരായ പലരും പിൻമാറിയപ്പോൾ സ്നേഹപൂർവ്വമായ നിർബ്ബന്ധത്തിൻ വഴങ്ങിയാണ് ഈ സുഹൃത്തുക്കൾ RP മാരായത്.)
     പരിശീലനത്തിന്റെ അവലോകനത്തിനായി ഇന്ന് ബി.ആർ.സി യിൽൽ നടന്ന യോഗത്തിൽ വെച്ച് എസ്.എസ്.എ സ്‌റ്റേറ്റ് പ്രോജക്ട് ഡയറക്ടർ ഡോ:എ.പി. കുട്ടികൃഷ്ണൻ ഇവർക്ക്‌ ബി.ആർ.സിയുടെ സ്നേഹോപഹാരം വിതരണം ചെയ്തു.ജില്ലാ പ്രൊജക്ട് ഓഫീസർ, ഡയറ്റ് ഫാക്കൽ ട്ടി അംഗം, ഉപജില്ലാ വിദ്യാഭ്യാസ ഓഫീസർ, ബി.പി.ഒ, പരിശീലന കേന്ദ്രത്തിലെ പ്രഥമാധ്യാപിക, ബി.ആർ.സി ട്രെയിനർമാർ തുടങ്ങിയവരുടെ സാന്നിദ്ധ്യത്തിലായിരുന്നു അനുമോദനവും ഉപഹാര വിതരണവും.
 ഉച്ചയ്ക്ക് സ്നേഹസദ്യയും ഒരുക്കിയിരുന്നു.കൂട്ടായ ചർച്ചയിലൂടെ ഓരോ ക്ലാസ്സിന്റെയും വിഷയത്തിന്റെയും പരിശീലന സംക്ഷിപ്തവും റിപ്പോർട്ടും തയ്യാറാക്കിയ ശേഷമാണ് ഇന്നത്തെ കൂടിച്ചേരൽ അവസാനിച്ചത്.പുതിയ അധ്യയന വർഷത്തിൽ ആവശ്യമായ സന്ദർഭങ്ങളിൽ ക്ലാസ് അടി സ്ഥാന ത്തിൽ /വിഷയാടിസ്ഥാനത്തിൽ നടക്കുന്ന അധ്യാപക പoനക്കൂട്ടായ്മകൾക്ക് ഇവർ നേതൃത്വം നൽകും,സുസ്ഥിരമായ അക്കാദമിക മികവിനായ്.

15 April, 2018

അവധിക്കാലം ആസ്വാദ്യകരമാക്കി പ്രതിഭോത്സവം

കളിച്ചും ചിരിച്ചും ചിത്രം വരച്ചും, പാട്ടു പാടിയും നൃത്തം ചെയ്തും അവർ പ്രഖ്യാപിച്ചു, 'അവധിക്കാലം ആസ്വദിക്കാനുള്ളതു തന്നെയാണ്.'സർവ്വശിക്ഷ അഭിയാന്റെ ആഭിമുഖ്യത്തിൽ ചെറുവത്തൂർ ബി.ആർ.സി കയ്യൂർ-പലോത്ത് കമ്യൂണിറ്റി ഹാളിൽ സംഘടിപ്പിച്ച ത്രിദിനപ്രതിഭോത്സവ മാണ് വൈവിധ്യമാർന്ന പ്രവർത്തനങ്ങളിലൂടെ
കുട്ടികളെ ആഹ്ലാദഭരിതരാക്കിയത്.ഭാഷ, ഗണിത, പരിസര പഠനപ്രവർത്തനങ്ങൾ ഉദ്ഗ്രഥിത രീതിയിലൂടെ അവതരിപ്പിച്ചപ്പോൾ താല്പര്യപൂർവം പങ്കാളികളാവുകയായിരുന്നു മുഴുവൻ കുട്ടികളും. സമൂഹ ചിത്രരചനയും ,
മുഖം മൂടി നിർമാണവും, വരികൾ കൂട്ടിച്ചേർക്കലും, ഈണം കണ്ടെത്തി അവതരിപ്പിക്കലും, കൊറിയോഗ്രാഫിയും, ക്ലോക്ക് കളിയും എല്ലാം കുട്ടികൾ ശരിക്കും ആസ്വദിച്ചു. കയ്യൂർ ഗവ: എൽ.പി.സ്കൂളിന്റെ നേതൃത്വത്തിൽ
പലോത്ത് കമ്യൂണിറ്റി ഹാളിൽ പ്രവർത്തിക്കുന്ന പ്രാദേശിക പ്രതിഭാ
കേന്ദ്രത്തിലെ 30 കുട്ടികളാണ് പ്രതിഭോത്സവത്തിൽ  പങ്കാളികളായത്. ഗ്രാമ പഞ്ചായത്ത് മെമ്പർ കെ.വിജയകുമാരി പ്രതിഭോത്സവം ഉദ്ഘാടനം ചെയ്തു.പി.ബാലകൃഷ്ണൻ ചടങ്ങിൽ അധ്യക്ഷത വഹിച്ചു.ബി.ആർ.സി.ട്രെയിനർ പി.കെ.സരോജിനി പ്രവർത്തന പരിപാടികൾ വിശദീകരിച്ചു.വിദ്യാ വളണ്ടിയർ മിനി പലോത്ത് സ്വാഗതവും സി.ആർ.സി കോ-ഓർഡിനേറ്റർ പി.സ്നേഹലത നന്ദിയും പറഞ്ഞു. സ്പെഷ്യലിസ്റ്റ് അധ്യാപകരായ മൃദുല, സുമ, ഷൈമ, രാധ, റീന, സജ്ന,ശ്യാം പ്രസാദ് വിദ്യാ വളണ്ടിയർമാരായ സുപ്രിയ, അജിന എന്നിവർ പ്രവർത്തനങ്ങൾക്ക് നേതൃത്വം നൽകി.
ഫോട്ടോ:
1. ഗ്രാമ പഞ്ചായത്ത് മെമ്പർ കെ.വിജയകുമാരി പ്രതിഭോത്സവം ഉദ്ഘാടനം ചെയ്യുന്നു.
2. പ്രതിഭോത്സവം ക്യാമ്പിൽ നിർമ്മിച്ച ക്ലോക്കുകളുമായി കുട്ടികൾ


12 April, 2018

പ്രതിഭകളെ തട്ടിയുണർത്താൻ പ്രതിഭോത്സവം


 മൈത്താണി ജി എൽ പി സ്കൂളിന്റെ നേതൃത്വത്തിൽ സർവശിക്ഷാ അഭിയാന്റെ സഹകരണത്തോടെ നടക്കാവ് കമ്മ്യൂണിറ്റി ഹാളിൽ പ്രവർത്തിക്കുന്ന പ്രതിഭാ കേന്ദ്രത്തിന്റെ പ്രതിഭോത്സവം ക്യാമ്പ് ആരംഭിച്ചു .ചിത്രം വരച്ചും പാട്ടുകൾ പാടിയും ശാസ്ത്ര പരീക്ഷണങ്ങളിൽ മുഴുകിയും സംഗീതത്തിന്റെ രാഗമഴ തീർത്തും കമനീയമായ കരകൗശല വസ്തുക്കൾ തീർത്തും അവധിക്കാലത്തെ വർണാഭമാക്കുന്നതായിരുന്നു ക്യാമ്പ്.തൃക്കരിപ്പൂർ ഗ്രാമപഞ്ചായത്ത് മെമ്പർ വി പ്രഭാകരൻ ക്യാമ്പ് ഉദ്ഘാടനം ചെയ്തു.പി ടി എ വൈസ് പ്രസിഡന്റ് വി വി സുരേശൻ അധ്യക്ഷനായിരുന്നു. ഗ്രാമ പഞ്ചായത്ത് മെമ്പർ പി കുഞ്ഞമ്പു, പി വേണുഗോപാലൻ, പി കെ സരോജിനി, പി സുപ്രിയ എന്നിവർ സംസാരിച്ചു.ബി ആർ സി പരിശീലകർ ,സ്പെഷലിസ്റ്റ് അധ്യാപകർ, വിദ്യാ വളണ്ടിയർമാർ എന്നിവരാണ് ക്യാമ്പിന് നേതൃത്വം നൽകുന്നത്.






 

ബി. ആര്‍.സി ചെറുവത്തൂര്‍ അക്കാദെമിക് ഫെസറ്റ് 31.03.2018

      മികവുറ്റ അക്കാദമിക പ്രവർത്തനങ്ങളുടെ അവതരണവും വിജയാനുഭവങ്ങളുടെ പങ്കുവയ്പും കൊണ്ട് ശ്രദ്ധേയമായി അക്കാദമിക് ഫെസ്റ്റ് .സർവശിക്ഷാ അഭിയാൻ ചെറുവത്തൂർ ബി ആർ സി യുടെ ആഭിമുഖ്യത്തിലാണ് മികവനുഭവങ്ങളുടെ ഉപജില്ലാതല അവതരണ വേദിയൊരുക്കിയത്.സംസ്ഥാനത്തെ വിവിധ വിദ്യാലയങ്ങളിലെ മികവിന്റെ നേർസാക്ഷ്യങ്ങളെ പരിചയപ്പെടുത്തിയും അവ സമൂഹത്തിലും കുട്ടികളിലും ചെലുത്തിയ സ്വാധീനം വിവരിക്കുന്നതിനും ചേർന്ന കൂട്ടായ്മ വിദ്യാഭ്യാസ മികവിലേക്ക് നടന്നടുക്കാനുള്ള ശ്രദ്ധേയ ചുവടുവയ്പായി.ബി ആർ സി യുടെ നേതൃത്വത്തിൽ നടത്തിയ തനതു പ്രവർത്തനങ്ങളുടെയും ഉപജില്ലയിലെ വിവിധ വിദ്യാലയങ്ങളുടെ പ്രവർത്തനങ്ങളുടെയും മുന്നൂറോളം പാനലുകൾ ഉൾപ്പെട്ട പ്രദർശനം പൊതു വിദ്യാഭ്യാസ സംരക്ഷണ യജ്ഞത്തിന്റെ കനത്ത വിളവെടുപ്പായി മാറി.
           സ്വാതന്ത്ര്യ സമര ചരിത്രാന്വേഷണ യാത്ര, പുതുമകളോടെ പുതുവർഷത്തിലേക്ക്, അമ്മ വായന കുഞ്ഞു വായന, പഠന പരി പോഷണ പരിപാടി, സാഹിത്യ സല്ലാപം അന്താരാഷ്ട്ര കടുവാ ദിന സെമിനാർ തുടങ്ങിയ തനതു പരിപാടികളാണ് ബി ആർ സിക്കു വേണ്ടി ബി പി ഒ    കെ നാരായണൻ അവതരിപ്പിച്ചത്. ചന്തേര ഐ ഐ എ എൽ പി സ്കൂൾ, ഉദിനൂർ സെൻട്രൽ എ യു പി സ്കൂൾ, കൂളിയാട് ഗവ.ഹൈസ്കൂൾ, ആലന്തട്ട എ യു പി സ്കൂൾ എന്നിവയുടെ മികവ് അവതരണവും നടന്നു. ഹരിത വിദ്യാലയം റിയാലിറ്റി ഷോ ഫൈനലിസ്റ്റുകളായ ചന്തേര ഐ ഐ എ എൽ പി സ്‌കൂൾ, ഉദിനൂർ സെൻട്രൽ എ യു പി സ്കൂൾ, ഉദിനൂർ സെൻട്രൽ എ യു പി സ്കൂൾ, ഉദിനൂർ ഗവ.ഹയർ സെക്കന്ററി സ്കൂൾ എന്നിവയെ ചടങ്ങിൽ അനുമോദിച്ചു. എസ് എസ് എ സംസ്ഥാന കൺസൾട്ടന്റ് ടി പി കലാധരൻ ഉപഹാരം സമ്മാനിച്ചു.
       നീലേശ്വരം ബ്ലോക്ക് പഞ്ചായത്ത് പ്രസിഡൻറ് വി പി ജാനകി അക്കാദമിക് ഫെസ്റ്റ് ഉദ്ഘാടനം ചെയ്തു.ഉപജില്ലാ വിദ്യാഭ്യാസ ഓഫീസർ ടി എം സദാനന്ദൻ അധ്യക്ഷനായിരുന്നു. വിത മുതൽ വിള വരെ പാനൽ പ്രദർശനം എസ് എസ് എ ജില്ലാ പ്രോജക്ട് ഓഫീസർ പി പി വേണുഗോപാലൻ ഉദ്ഘാടനം ചെയ്തു.പൊതു വിദ്യാലയങ്ങൾ മികവിന്റെ പാതയിൽ അനുഭവസാക്ഷ്യം എസ് എസ് എ സംസ്ഥാന കൺസൾട്ടന്റ് ഡോ. ടി പി കലാധരൻ അവതരിപ്പിച്ചു. മികവനുഭവങ്ങളെ വിലയിരുത്തി അദ്ദേഹം സംസാരിച്ചു. അധ്യാപകരുടെയും രക്ഷിതാക്കളുടെയും ഇടപെടലിലൂടെയും അവധിക്കാല പ്രവർത്തനാവതരണത്തിലൂടെയും ഓപ്പൺ ഫോറം സമ്പന്നമായി. ചന്തേര ഐ ഐ എൽ പി  സ്കൂൾ വിദ്യാർഥികൾ അവതരിപ്പിച്ച ഹരിതവിദ്യാലയം റിയാലിറ്റി ഷോ ശീർഷകഗാനത്തിന്റെ രംഗാവിഷ്കാരം, ബി ആർ സി സ്പെഷലിസ്റ്റ് അധ്യാപികമാരുടെ ഗാനസദസ്സ് എന്നിവയും അരങ്ങേറി. പരിശീലകരായ പി വി ഉണ്ണിരാജൻ സ്വാഗതവും പി വേണുഗോപാലൻ നന്ദിയും പറഞ്ഞു.

24 March, 2018

പ്രവൃത്തി പരിചയ അധ്യാപികയുടെ നിർദേശമനുസരിച്ച് പാടിക്കീൽ ഗവ:യു .പി .സ്കൂളിലെ ഏഴാം ക്ലാസ്സുകാർ 'പലഹാരപ്രദർശനം' ഒരുക്കിയപ്പോൾ കാണാനെത്തിയ പ്രഥമാധ്യാപകനും
ക്ലാസ്സ് ടീച്ചർക്കും, മറ്റ് അധ്യാപകർക്കും അത് വേറിട്ട അനുഭവമായി. സ്വന്തമായുണ്ടാക്കിയ '
'കുംസ്' കൂട്ടുകാർക്കും
അധ്യാപകർക്കും വിതരണം ചെയ്ത് സ്കൂൾ
ലീഡറായ മുഫീദഷാഫി ചേരുവയും,
ഉണ്ടാക്കുന്ന വിധവും പരിചയപ്പെടുത്തി പലഹാരവിശേഷങ്ങൾ പങ്കുവെച്ചു.
പ്രദർശനം കാണാനെത്തിയ
ചെറുവത്തൂർ ബി.പി.ഒ
കെ.നാരായണൻ ഓരോ കുട്ടിയോടും
അവരവർ കൊണ്ടുവന്ന പലഹാരത്തിന്റെ വിശേഷങ്ങൾ ചോദിച്ചറിഞ്ഞു.
കാരയപ്പം, കാരറ്റ് ലഡു, ആവിയപ്പം, ഉള്ളി വട,പരിപ്പുവട, ഇലയട, അരിയുണ്ട, പത്തൽ, പപ്സ്, പഴംപൊരി.. തുടങ്ങി ചിക്കൻ റോൾ വരെയുള്ള ഇരുപതിലധികം വൈവിധ്യമാർന്ന പലഹാരങ്ങളുടെ വിശേഷങ്ങൾ ഓരോരുത്തരും അവതരിപ്പിച്ചു.
അമ്മയുടെയും അച്ഛന്റെയും സഹായത്തോടെ
ആദ്യമായി പാചക വിദ്യയിലേർപ്പെട്ട് നിർമ്മിച്ച പലഹാരം പരസ്പരം പങ്കുവെച്ച് കഴിച്ചപ്പോൾ കുരുന്നു മനസ്സുകളിൽ
നിറയെ സന്തോഷം!ഒപ്പം കേവലം മേളകൾക്കും, പരീക്ഷകൾക്കും വേണ്ടി മാത്രമല്ല 'പ്രവൃത്തി പഠനം' എന്ന് കുട്ടികളെയും രക്ഷിതാക്കളെയും ബോധ്യപ്പെടുത്താൻ ഇതുവഴി സാധിച്ചതിൽ
സർവശിക്ഷ അഭിയാൻ നിയമിച്ച ചെറുവത്തൂർ ബി.ആർ.സിയിലെ സ്പെഷ്യലിസ്റ്റ് അധ്യാപിക കെ.വി.ഉഷയ്ക്കും ഇത് അഭിമാനത്തിന്റെ നിമിഷമായി. സ്കൂളിലെ മുഴുവൻ കുട്ടികളിലേക്കും പലഹാര മധുരം എത്തിച്ച ഏഴാം ക്ലാസ്സിലെ ചേട്ടൻമാരും ചേച്ചിമാരുടെയും മാതൃക പിന്തുടർന്ന് ഒരു കൈ നോക്കാൻ തന്നെയാണ് മറ്റു ക്ലാസ്സുകാരുടെയും തീരുമാനം. പ്രഥമാധ്യാപകൻ വി.ദാമോദരൻ, ക്ലാസ്സ് ടീച്ചർ മാധവൻ, പ്രവൃത്തി പഠന അധ്യാപിക കെ .വി .ഉഷ എന്നിവർ പലഹാര പ്രദർശനത്തിന് നേതൃത്വം നൽകി.

20 March, 2018

''ഒരു എൽ.പി.സ്കൂളിന്റെ വാർഷികാഘോഷം ഉദ്ഘാടനം ചെയ്യാൻ വിദ്യാഭ്യാസ മന്ത്രി വരുമോ?''.... നോട്ടീസ് കണ്ടപ്പോൾ സംശയിച്ചവർ ഏറെ... വരില്ലെന്ന് ഉറച്ചു വിശ്വസിച്ചവരും ധാരാളം.. അപ്പോഴും പ്രതീക്ഷ വിടാതെ കാത്തിരുന്നു, അധ്യാപകർക്കും, വിദ്യാർഥികൾക്കും രക്ഷിതാക്കൾക്കുമൊപ്പം ഒരു ഗ്രാമം മുഴുവൻ - പ്രിയപ്പെട്ട മന്ത്രിയുടെ വരവിനായി... പ്രതീക്ഷ തെറ്റിയില്ല; നിശ്ചിത സമയത്തു തന്നെ പൊതുവിദ്യാഭ്യാസ സംരക്ഷണ യജ്ഞത്തിന്റെ അമരക്കാരൻ കേരള വിദ്യാഭ്യാസ വകുപ്പ് മന്ത്രി പ്രൊഫ: സി.രവീന്ദ്രനാഥ് എത്തി! കാസർഗോഡ് ജില്ലയുടെ തെക്കേ അറ്റത്തെ തീരദേശ പഞ്ചായത്തായ വലിയ പറമ്പിലെ മാടക്കാൽ ഗവ: എൽ.പി.സ്കൂളിന്റെ എഴുപത്തിരണ്ടാം വാർഷികാഘോഷം ഉദ്ഘാടനം ചെയ്യാൻ! പക്ഷെ, ഇത് കേവലമായ ഒരു ഉദ്ഘാടനച്ചടങ്ങല്ലെന്ന് മന്ത്രിയുൾപ്പെടെ എല്ലാവർക്കും ബോധ്യമായി, തുടക്കത്തിൽത്തന്നെ.കലാഭവൻ മണിയുടെ 'മിന്നാമിനുങ്ങേ ...' എന്ന പാട്ട് പാടി മിനി സ്ക്രീനിലൂടെ പ്രേക്ഷകലക്ഷങ്ങളുടെ പ്രശംസ പിടിച്ചുപറ്റുകയും തുടർന്ന്‌ സംസ്ഥാന സർക്കാറിന്റെ 'ഉജ്വല ബാല്യം' ബഹുമതി കരസ്ഥമാക്കുകയും ചെയ്ത മാടക്കാൽ സ്കൂളിലെ ഗോകുൽ രാജ് അകക്കണ്ണിലൂടെ മന്ത്രിയെ കണ്ട് .. തൊട്ട് .. തലോടി..ബൊക്ക നൽകി സ്വീകരിച്ചു.. ചെറുവത്തൂർ ബി.ആർ.സിയിലെ ചിത്രകലാധ്യാപകനായ ശ്യാമപ്രസാദ് സ്കൂൾ മുറ്റത്ത് ഒരുക്കിയ പൊതുവിദ്യാഭഭ്യാസ സംരക്ഷണ ശില്പം അനാച്ഛാദനമായിരുനന്നു ആദ്യ പരിപാടി. തൊട്ടുത്തായി ഒരുക്കിയ 'വായനപ്പുര' മന്ത്രിയുടെ മനം കുളിർപ്പിച്ചു. പൂർവ വിദ്യാർഥി കൂട്ടായ്‌മയിൽ രൂപം കൊണ്ട ലൈബ്രറി കുട്ടികൾക്കായി തുറന്നു കൊടുത്ത ശേഷമായിരുന്നു ഹ്രസ്വമായ പ്രസംഗവും ഉദ്ഘാടനവും. ശില്പം, വായനപ്പുര, ലൈബ്രറി.. ഇവ മൂന്നും അക്കാദമിക മികവിലേക്ക് മുന്നേറുന്ന വിദ്യാലയത്തിന്റെ പ്രതീകങ്ങളായി മന്ത്രി സാക്ഷ്യപ്പെടുത്തി... ഒന്നാം ക്ലാസ്സിലെ കുട്ടികളുടെ എണ്ണം 16 ൽ നിന്ന് 32 ആയി വർധിപ്പിക്കാൻ നടത്തിയ കൂട്ടായ്മയെ
മന്ത്രി അഭിനന്ദിച്ചു.കഴിഞ്ഞ വർഷത്തെ എൽ.എസ്.എസ് വിജയികൾക്ക് ഉപഹാരങ്ങൾ നൽകി.സ്കൂൾ മാപ്പിങ്ങിന്റെ അടിസ്ഥാനത്തിൽ, യു.പി.സ്കൂൾ ആവശ്യമാണെന്ന് ബോധ്യപ്പെടുന്നയിടങ്ങളിൽ അവ അനുവദിക്കാൻ നയപരമായ തീരുമാനമെടുക്കുന്ന സന്ദർഭത്തിൽ മാടക്കാൽ എൽ.പി.സ്കൂൾ അപ്ഗ്രേഡ് ചെയ്യാനുള്ള സാധ്യതയും പരിശോധിക്കാമെന്ന മന്ത്രിയുടെ വാക്കുകൾ ഹർഷാരവത്തോടെയാണ് നിറഞ്ഞ സദസ്സ് സ്വീകരിച്ചത് .. ഒരു കാര്യം ഉറപ്പ് ...
മന്ത്രി എത്തിയത് കേവലം ഒരു ഉദ്ഘാടനച്ചടങ്ങിനല്ല...മറിച്ച് ജനകീയ കൂട്ടായ്മയിലൂടെ അക്കാദമിക മികവിലേക്ക് കുതിക്കുന്ന ഒരു ഗ്രാമീണ വിദ്യാലയത്തെ അനുമോദിക്കാനും, അംഗീകരിക്കാനും പിന്തുണയ്ക്കാനുമായിരുന്നു.