രാമായണം ക്വിസ്

വിദ്യാലയ സന്ദര്‍ശന കുറിപ്പുകള്‍-1
ഒന്നാംക്ലാസ്സുകാരുടെ കുട്ടിപ്പുസ്തകങ്ങളും ചിഹ്നം ചേര്‍ക്കാത്ത വാക്യസ്ട്രിപ്പുകളും

ഓരോയൂനിറ്റ് പഠിപ്പിച്ചു തീരുമ്പോഴും ഓരോകുട്ടിക്കും ഓരോ കുട്ടിപ്പുസ്തകം.എ4 പേപ്പര്‍ നാലായി മടക്കിയതിന്റെ അത്രയും മാത്രം വലുപ്പമുള്ള ആറ് പേപ്പറുകള്‍ ചേര്‍ന്നത്.ഇതില്‍ ചിത്രംവരയും പദങ്ങളുടെയും വാക്യങ്ങളുടെയും എഴുത്തുമുണ്ട്.സ്റ്റാപ്പിള്‍ ചെയ്ത് മനോഹരമായ പുസ്തകമാക്കിയിരിക്കുന്നു.

ഒന്നാംപേജില്‍ യൂനിറ്റിന്റെ പേരും കുട്ടിയുടെ പേരും.രണ്ടാംപുറത്തില്‍ യൂനിറ്റിലെ ഏതെങ്കിലും ആശയവുമായി ബന്ധപ്പെട്ട ചിത്രം.മൂന്നുംനാലും പേജുകളില്‍ യൂനിറ്റില്‍ കടന്നുവന്ന പദങ്ങള്‍ ,അഞ്ചാം പേജില്‍ യൂനിറ്റില്‍ പരിചയപ്പെട്ട വാക്യങ്ങളോ കൊച്ചു പാഠങ്ങളോ,ആറാംപേജില്‍ ഇഷ്ടമുള്ള ഒരുചിത്രം.മനോഹരം തന്നെ ഈ കുട്ടിപ്പുസ്തകം

കൂളിയാട് ഗവ.യുപി സ്കൂളിലെ സൗദാമിനി ടീച്ചറുടെ ഒന്നാംക്ലാസ്സിലെ കുട്ടികളുടേതാണ് ഈ കുട്ടിപ്പുസ്തകം.ക്ലാസില്‍ 33 കുട്ടികള്‍.എല്ലാവര്‍ക്കും എഴുതാനുംവായിക്കാനും കഴിയുന്നു.എല്ലാവരുടെയും പഠിപ്പിച്ചുതീര്‍ന്ന മൂന്ന് യൂനിറ്റിലെയും കുട്ടിപ്പുസ്തകങ്ങള്‍ കണ്ടു.മിക്കവയും വായിച്ചുനോക്കി.എത്ര സര്‍ഗാത്മകമായാണ് ടീച്ചര്‍ അത് വികസിപ്പിച്ചിരിക്കുന്നത്.ഒന്നാം യൂനിറ്റില്‍ മൂന്ന് വാക്യങ്ങള്‍ മാത്രം എഴുതിയ കുട്ടികള്‍ മൂന്നാം യൂനിറ്റിലെത്തുമ്പോഴേക്കും ഇരപതിലധികം വാക്യങ്ങളാണ് എഴുതിയിരിക്കുന്നത്.ചിത്രംവരയ്ക്കുന്നതിലും നിറം നല്‍കുന്നതിലുമുണ്ട് ഈ വളര്‍ച്ച.

  ഉച്ചഭക്ഷണം കഴിച്ചുകഴിഞ്ഞതിനുശേഷമുള്ള ഒഴുവുസമയത്തും ഒന്നാം തരത്തിലെ കുട്ടികള്‍ തിരക്കിലാണ്.എല്ലാവരുടെയും കയ്യില്‍ ഓരോ വാക്യസ്ട്രിപ്പുകള്‍.എല്ലാം പോളിത്തീന്‍ കവറിലിട്ട് ലാമിനേഷന്‍ ചെയ്തതു പോലെയുണ്ട്.ശ്രദ്ധിച്ചുനോക്കിയപ്പോള്‍ വാക്യങ്ങള്‍ക്കൊന്നും ചിഹ്നങ്ങളില്ല.കുട്ടികളെല്ലാം അവര്‍ക്കുകിട്ടിയ വാക്യ സ്ട്രിപ്പുകള്‍ വായിച്ച് ചിഹ്നങ്ങള്‍ ചേര്‍ക്കുകയാണ്.ലാമിനേഷന് മുകളിലാണ് എഴുതുന്നത്.എഴുതിക്കഴിഞ്ഞാല്‍ അവ ടീച്ചറെ വായിച്ച് കേള്‍പിക്കണം.നോട്ട്ബുക്കില്‍ എഴുതണം.പിന്നീട് ചിഹ്നങ്ങള്‍ മായ്ചുകളയും.മായ്ചുകളഞ്ഞ വാക്യ സ്ട്രിപ്പ് നാളെ  മറ്റൊരാള്‍ ഉപയോഗിക്കും.ഈ പ്രവര്‍ത്തനം എല്ലാ ദിവസവും ഉച്ചഭക്ഷണത്തിനുശേഷം നടക്കുന്നതാണ്,ഇങ്ങനെയുള്ള ഇരുന്നൂറോളം വാക്യസ്ട്രിപ്പുകളുണ്ട് ടീച്ചറുടെ ക്ലാസ്സില്‍.തെറ്റില്ലാതെ ചിഹ്നങ്ങള്‍ ചേര്‍ത്തെഴഉതാന്‍ ടീച്ചര്‍ ചെയ്യുന്ന പ്രവര്‍ത്തനം എത്ര സര്‍ഗാത്മകമാണല്ലേ.

ഓരോദിവസവും ശ്രദ്ധയോടെ കൃത്യമായ ചോദ്യങ്ങളിലൂടെ രൂപീകരിക്കുന്ന പാഠങ്ങള്‍,അവയുടെ വായനയും എഴുത്തും.ആശയരൂപീകരണത്തിന് സഹായിക്കുന്ന ധാരാളം വര്‍ക്ക്ഷീറ്റുകള്‍,ഓരോ യൂനിറ്റിന് ശേഷവും നടത്തുന്ന യൂനിറ്റ് ടെസ്റ്റുകള്‍,കുട്ടികള്‍ വരച്ചും എഴുതിയും ശേഖരിച്ചും തയ്യാറാക്കിയ പോര്‍ട് ഫോളിയോകള്‍.ഒരുപേജ് പോലും കീറാതെ മനോഹരമായി .സൂക്ഷിച്ച നോട്ടുപുസ്തകങ്ങള്‍.എല്ലാം കൊണ്ടും പഠനം ആസ്വദിക്കുകയാണ് സൗദാമിനി ടീച്ചറുടെ ക്ലാസിലെ കുട്ടികള്‍